အသက်ကြီး၍အမြင်လွှာပျက်စီးခြင်း

အသက်ကြီး၍အမြင်လွှာ ဆွေးမြေ့ပျက်စီးယိုယွင်းခြင်း (AMD) ဆိုသည်မှာ အသက် (၅၀)ကျော်လာသူများတွင် ဖြစ်သော မြင်ကွင်း၏အလယ်ဗဟိုတွင် အမြင်အားကျခြင်း (သို့မဟုတ်) အမြင်အားဆုံးရှုံးလာခြင်း ဖြစ်သည်။ ကမ္ဘ္ဘာပေါ်တွင် အဖြစ်အများဆုံးသော အမြင်အားဆုံးရှုံးစေနိုင်သည့် အကြောင်းအရာများတွင်တစ်ခု အပါအ၀င် ဖြစ်ပေသည်။ သက္ကရာဇ် ၂၀၂၀ ပြည့်နှစ်ရောက်လျှင် အသက်ကြီး၍အမြင်လွှာ ပျက်စီးယိုယွင်းခြင်း ရောဂါသည် လူသန်းပေါင်း ၁၉၆ သန်းခန့်အထိ ဖြစ်ပွားနိုင်သည် ဟုခန့်မှန်းထားကြသည်။ ဤရောဂါသည် အလယ်မြင်ကွင်းကွယ်ခြင်း (သို့မဟုတ်) အမြင်အားကျခြင်းကို ဖြစ်ပေါ်စေနိုင်သော်လည်း ထာဝရအမြင်ကွယ်ခြင်းလည်း ဘေးမြင်ကွင်းမှာ အကောင်းအတိုင်း ကျန်ရှိနေလေ့ရှိသောကြောင့် လုံးဝအမှောင်ဖုံး၍ လူတွဲရသည်အထိ အမြင်ကွယ်ခြင်းမျိုးတော့ ဖြစ်လေ့မရှိပါ။

ရောဂါဖြစ်ပွားနိုင်ချေများစေသည့်အချက်များ

အသက်အရွယ်ကြီးခြင်း၊ အမျိုးသမီးဖြစ်ခြင်း၊ ရောဂါမျိုးရိုးဗီဇပါခြင်းတို့ ဖြစ်ပေသည်။ ထို့အပြင် ဆေးလိပ်သောက်ခြင်း၊ အ၀လွန်ခြင်း၊ အဟာရပြည့်ဝသော အစားအစာစားသုံးမှု နည်းခြင်းတို့လည်းပါဝင်သည်။

အကယ်၍ မျက်စိတစ်ဘက်တွင် ၄င်းရောဂါဖြစ်ပွားခဲ့ပါက အခြားတစ်ဘက်တွင်လည်း  ရောဂါဖြစ်နိုင်ချေများသည်။ ရောဂါမျိုးခွဲ နှစ်မျိုးရှိပါသည်။

• အမြင်လွှာလုံးပါးပါး ခြင်းကြောင့်ဖြစ်ပေါ်သော (AMD) ရောဂါ အခြောက်ဆွေးမြေ့ခြင်း (Dry AMD) နှင့်
• အမြင်လွှာလုံးပါးပါး ခြင်း အပြင် ပုံမှန် မဟုတ်သော သွေးကြောများ ဖြစ်ပေါ်ခြင်း နှင့် ထို သွေးကြောများမှ အရည်စိမ့်ခြင်း တို့ဖြစ်သော AMD ရောဂါ အစိုဆွေးမြေ့ခြင်း (Wet AMD) တို့ဖြစ်သည်။

ရောဂါကုထုံးများ

(၁) Dry AMD

ဆေးလိပ်ဖြတ်ခြင်း၊ မျက်စိကို အချိန်ကြာမြင့်စွာ နေရောင်ခြည် ထိတွေ့မှုမှ ကာကွယ်ခြင်း၊ ကိုယ်အလေးချိန်လျှော့ချခြင်းကဲ့သို့ လူနေမှုပုံစံ ပြောင်းလဲခြင်း၊ ဆန့်ကျင်ဓါတ်တိုးပစ္စည်း (Anti-oxidant) ပါဝင်မှုနှုန်းများသော အစားအစာများ (ဥပမာ ဟင်းနုနွယ်၊ ပန်းဂေါ်ဖီစိမ်း၊ ဂေါ်ဖီထုပ်) စားသုံးခြင်း၊ Omaga 3 ပါဝင်မှုနှုန်းများသော ငါးများ (ဥပမာ ငါးသေတ္တာငါး၊ ဆော်လမွန်ငါး) စားသုံးခြင်း၊ Lutein နှင့် Zeaxanthin ပါဝင်သော ဗိုက်တာမင် အားဆေးများစားသုံးခြင်းဖြင့် ရောဂါဖြစ်ပွားနှုန်းကို လျော့ချနိုင်ပြီး ကာကွယ်နိုင်ပါသည်။

(၂) Wet AMD

အကောင်းဆုံးသော ကုထုံးမှာ အလွန်သေးငယ်သောအပ်ဖြင့် မျက်စိအတွင်းသို့ ပုံမှန်မဟုတ်သော သွေးကြောများ ဖြစ်ပေါ်စေသည့် ဓါတ်ကိုတားဆီးပေးသော ဆေး  (Anti-VEGF) ထိုး၍ကုသခြင်းဖြစ်သည်။ ဆေးထိုးကုသခြင်းမှာ ရောဂါအခြေအနေပေါ် မူတည်၍ ဆေးထိုးရမည့် အကြိမ် အရည်အတွက် အနည်းအများ ကွာခြားမှုရှိသည်။ အချို့လူနာများတွင် ရောဂါ အခြေအနေပေါ် မူတည်၍ ဆေးထိုးကုသခြင်း အပြင်လေဆာဖြင့် ကုသမှုပါလို အပ်ပါသည်။

AMD ရောဂါနှင့်ပတ်သတ် မေးလေ့ရှိသော မေးခွန်းများ

မြင်ကွင်းအလယ်ကိုစမ်းသပ်သောကဒ်ပြား (Amsler chart)ကို အသုံးပြု၍ မိမိရောဂါ အခြေအနေကို ဆန်းစစ်နိုင်သည် ဟုကြားဖူးပါသည်။ ဟုတ်ပါသလား။

ဆန်းစစ်နိုင်ပါသည်။ Amsler Chart ဆိုသည်မှာ မိမိ၏ မြင်ကွင်းအလယ် ကောင်းမကောင်း မိမိဘာသာ ဆန်းစစ်နိုင်သော ကဒ်ပြားဖြစ်သည်။ အသုံးပြုပုံမှာ အလင်းရောင်ကောင်းစွာရရှိသော နေရာတွင်ပြုလုပ်ရပါမည်။ မျက်မှန်တပ်ဆင်ရသူဖြစ်ပါက မျက်မှန် တပ်ဆင်၍ ကဒ်ပြားနှင့် (၃၀-၄၀) စင်တီမီတာ (ပုံမှန်စာဖတ်လျှင် ကြည့်သည့်အကွာဝေး) အကွာမှ ဖတ်ရှုရမည်။ ထိုသို့ ဖတ်ရှုရာတွင် မျက်စိတစ်ဘက်ခြင်းစီ ပိတ်၍ကဒ်၏ အလယ်ဗဟိုရှိအမည်းစက်ကို စိုက်ကြည့်ပြီး ကဒ်ပြားပေါ်ရှိ အကွက်များပျောက်ခြင်း၊ တွန့်ခြင်း၊ ယိုင်ခြင်း ရှိမရှိစစ်ဆေးရပါမည်။ အထက်ဖော်ပြပါလက္ခဏာများရှိပါက ကျွမ်းကျင်သော မျက်စိဆရာဝန်နှင့် ဆွေးနွေးတိုင်ပင်ရန် လိုအပ်ပါသည်။